Биринчи қоидабузарлик учун тадбиркорга огоҳлантириш берилади
Фуқароларнинг ҳаёти ва соғлиғига, шунингдек, бошқа шахсларнинг мол-мулкига зарар етмаган тақдирда, дарҳол жарима қўлланмайди. Тадбиркорга камчиликни бартараф этишга 10 кун берилади.
Президент Шавкат Мирзиёевнинг Хоразм вилоятида тадбиркорлар билан ўтказилган VI очиқ мулоқотида иқтисодий ва молиявий жарималарни қўллаш бўйича янги ёндашув маълум қилинганди.
Бизнес-омбудсманга кўра, эндиликда “биринчи қоидабузарлик учун — огоҳлантириш” тамойили жорий этилади. Агар қоидабузарлик тадбиркор томонидан биринчи марта содир этилган бўлса, фуқароларнинг ҳаёти ва соғлиғига, шунингдек, бошқа шахсларнинг мол-мулкига зарар етмаган тақдирда, дарҳол жарима қўлланмайди.
Бундай ҳолатда тадбиркорга аниқланган камчиликни бартараф этиш учун 10 кун муддат берилади.
Янги тартиб биринчи хато учун жавобгарликни бутунлай бекор қилишни англатмайди. Асосий мақсад — тадбиркорни дарҳол жазолаш ўрнига, унга аниқланган камчиликни ихтиёрий равишда тузатиш имконини бериш.
Шунингдек, янги ёндашув маъмурий босимни камайтириш, назорат тадбирларини профилактик йўналишга ўтказиш ва тадбиркорларнинг ҳуқуқларини ҳимоя қилишга қаратилган.
Агар огоҳлантириш тамойилига риоя қилинмаган ёки тадбиркорга асоссиз равишда жарима қўлланган деб ҳисобланса, у Бизнес-омбудсманга мурожаат қилиши мумкин.
Қайд этилишича, янги тартибда асосий эътибор тадбиркорни жазолашга эмас, қоидабузарликни бартараф этиш ва келгусида унинг такрорланишининг олдини олишга қаратилади.
