“Бирорта бозор ёпилмайди ва ўз функциясини йўқотмайди” — Шавкат Умурзоқов

 

Тошкент шаҳрида бозорлар ва савдо мажмуаларини замонавий талаблар асосида ривожлантириш бўйича янги лойиҳалар амалга оширилмоқда. Бу ҳақда пойтахт ҳокими Шавкат Умурзоқов ЎзАга берган интервьюсида маълум қилди.

 

Ҳокимнинг таъкидлашича, 35 та давлат бозори ва савдо мажмуаси инвесторларга таклиф этилмоқда. Улар қаторида «Сергели» автомобиль бозори, «Ўрикзор», «Қўйлиқ» каби йирик бозорлар ҳам бор.

 

Шавкат Умурзоқов бозорларга инвестиция жалб қилиш жараёнида уларнинг фаолияти тўхтатилмаслигини алоҳида таъкидлади.

 

“Бир нарсани аниқ айтаман: бирорта бозор ёпилмайди ва ўз функциясини йўқотмайди”, — деди ҳоким.

 

Инвесторлар олдига учта асосий шарт қўйилади. Жумладан, улар белгиланган ҳажмдаги савдо расталарини замонавий шаклда қуриб, давлатга топшириши, мавжуд тадбиркорларнинг иш ўринларини сақлаб қолиши ҳамда етарли сиғимдаги автотураргоҳларни барпо этиши керак бўлади.

 

Инвесторлар самарасиз фойдаланилаётган майдонларда савдо, хизмат кўрсатиш ва кўнгилочар объектларни ташкил этиш имкониятига эга бўлади.

 

Шунингдек, Тошкентда 200 мингта автомобилга мўлжалланган кўп қаватли ва ерости автотураргоҳлар учун жойлар белгиланган. Ушбу майдонлар Урбанизация ва уй-жой бозорини барқарор ривожлантириш миллий қўмитаси билан ҳамкорликда аниқланган ва босқичма-босқич аукционга чиқарилади.

 

Ҳоким автотураргоҳлар масаласида аввалги хатоларга ҳам тўхталди. Унинг қайд этишича, илгари автотураргоҳлар учун ажратилган айрим ерларда бизнес марказлари қуриб юборилган.

 

“Афсуски, илгари автотураргоҳ учун ажратилган кўплаб ерларда бизнес марказлар қурилиб кетилган. Бунақа хатолар такрорланмаслиги учун бугунги кунда тегишли органлар билан бу масалани қаттиқ назорат остига олганмиз”, — деди у.

 

Бундан ташқари, пойтахтда умумий узунлиги 140 километрга яқин бўлган 10 га яқин кўча 24/7 ишлайдиган туристик ва гавжум кўчалар сифатида тоифаларга ажратилган. Ҳозирча синов тариқасида туну кун фаолият юритадиган 8 та кўча ташкил этилган.

 

Ушбу кўчаларда ишлар фақат ободонлаштириш ва қурилиш билан чекланмайди. Инфратузилмани бошқариш, ҳудудларни озода сақлаш ва турли тадбирларни ташкил этиш учун махсус бошқарув компаниялари ҳам жалб қилинмоқда.