“Уруш давом этаётган пайтда сайлов ўтказиш Украинани парчалаб юборади” – Зеленский
Украина президенти мамлакатда сайлов ўтказиш масаласини муҳокама қилишдан аввал уруш шароитидаги хавфсизлик муаммолари ва жамиятдаги эҳтимолий бўлинишларни ҳисобга олиш зарурлигини таъкидлаган.
Украина президенти Владимир Зеленский Россия билан уруш давом этаётган бир пайтда мамлакатда сайлов ўтказиш Украинани ичидан бўлиб юбориши ва давлатни заифлаштириши мумкинлигини билдирди. Бу ҳақда Reuters хабар берди.
Президент бу фикрни собиқ мудофаа вазири Михайло Федоровнинг уруш шароитида сайлов ўтказиш ҳақидаги чақириғига жавобан билдирган. Федоровнинг ўтган ҳафта сайлов ўтказиш таклифи Украина сиёсатида уруш бошланганидан бери амалдаги президентга нисбатан энг жиддий ички чақириқлардан бири бўлганди.
Зеленский уруш шароитидаги сайлов мамлакатдаги мавжуд сиёсий ва ижтимоий бўлинишларни кучайтириши мумкинлигини таъкидлаган. Унинг айтишича, ҳозирги вазиятда сайлов ўтказиш “давлат учун цунами” бўлиб, Украинани бўлиб юбориши мумкин.
Украинада ҳарбий ҳолат амал қилаётган даврда сайлов ўтказиш қонунчилик билан тақиқланган. Бундан ташқари, мамлакат ҳудудининг бир қисми Россия назоратида экани, миллионлаб украиналиклар хорижда яшаётгани ва кўплаб фуқаролар фронтда хизмат қилаётгани сайловни ташкил этиш билан боғлиқ жиддий муаммоларни юзага келтирган.
Зеленскийнинг таъкидлашича, агар халқаро ҳамкорлар сайловлар вақтида мамлакат хавфсизлигини кафолатлай олса, бундай жараённи ўтказиш имконияти кўриб чиқилиши мумкин. Бироқ ҳозирча бундай кафолатни тақдим этиш бўйича ҳеч қандай аниқ режа таклиф қилинмаган.
Украина президентининг айтишича, ҳозирги асосий вазифа сайловга тайёргарлик кўриш эмас, балки урушни якунлаш ва мамлакатнинг мустақиллиги ҳамда суверенитетини сақлаб қолишдан иборат.
Шу билан бирга, Кйив халқаро социология институти 5 август куни ўтказган сўровда украиналикларнинг 57 фоизи сайловлар фақат уруш тугаганидан кейин ўтказилишини маъқул кўрган.
