АҚШ иммиграцион виза аризаларини кўриб чиқишни тўхтатди
Давлат департаменти бу чорани глобал ўқув тадбири билан изоҳлади.
Доналд Трамп маъмурияти иммиграция сиёсатини кучайтириш доирасида иммиграцион визаларга оид аризаларни кўриб чиқишни вақтинча тўхтатди. Бу ҳақда Reuters АҚШ Давлат департаменти вакилига таяниб хабар берди.
Давлат департаменти маълумотига кўра, АҚШнинг бутун дунё бўйлаб барча элчихона ва консулликларида глобал ўқув тадбири бошланган. Шу муносабат билан виза хизматларини кўрсатиш тартибига тегишли ўзгартиришлар киритилган ва улар тренинг якунлангунга қадар амал қилади.
Reuters қайд этишича, мазкур чоралар Трамп маъмуриятининг депортация ва иммиграция сиёсатини кучайтиришга қаратилган кенг кўламли кампанияси доирасида амалга оширилмоқда. Сўнгги даврда АҚШ расмийлари турли сабабларга кўра визалар ва доимий яшаш ҳуқуқини бекор қилиш ҳолатларини ҳам кучайтирган.
Аввалроқ, АҚШ маъмурияти бошпана сўраган ёки бошпана олиш жараёнида бўлган 200 минггача хорижликнинг B1/B2 туристик ва бизнес визаларини бекор қилишни режалаштираётгани ҳақида хабар берилган эди.
Шунингдек, АҚШ Давлат департаменти сўнгги 18 ой давомида жиноятларда айбланган ёки судланган, шунингдек, АҚШ сиёсатини очиқ танқид қилган айрим шахсларнинг визаларини бекор қилган.
АҚШ маъмурияти виза бекор қилиш механизмидан иммиграция сиёсатини амалга ошириш ҳамда мамлакат хавфсизлигига таҳдид солиши мумкин бўлган хорижий фуқароларни аниқлаш воситаси сифатида фойдаланишда давом этишини билдирган.
