Миср қироличаси Назли таққан миллионлаб долларлик маржон Вена музейидан ўғирланди

Мисрнинг собиқ қироличаси Назлига тегишли бўлган, 673 та қимматбаҳо тош билан безатилган маржон Венадаги Амалий санъат музейидан (МАК) ўғирланди. Бу ҳақда Al Arabiya хабар берди.

 

Тақинчоқнинг қиймати бир неча миллион долларга баҳоланмоқда.

 

Полиция маълумотига кўра, икки эркак музейга кириш учун чипта сотиб олган. Кейин улар болға ёрдамида маржон жойлаштирилган шиша витринасини синдириб, тақинчоқни олиб қочган. Гумондорлар ниқоб тақмаган ва кузатув камераларига тушган.

 

Ўғирланган маржон Van Cleef & Arpels компаниясининг француз дизайнерларига бағишланган кўргазмада намойиш этилаётган эди. Кўргазмада июнь ойидан буён қарийб 500 та буюм тақдим этилган.

 

Маржон Мисрнинг собиқ қироллик оиласи учун яратилган. Қиролича Назли уни 1939 йилда қизи Фавзия ва Эроннинг бўлажак шоҳи Муҳаммад Ризо Паҳлавийнинг никоҳ тўйида таққан.

 

Van Cleef & Arpels компанияси ўз сайтида мазкур тақинчоқни “оқ заргарлик санъатининг тантанаси” деб таърифлаган.

 

МАК музейи ўғирликни тасдиқлаган, бироқ тергов давом этаётгани сабабли қўшимча изоҳ бермаган. Полиция гумондорларни қидиришни давом эттирмоқда.

 

Мазкур ўғирлик Европа музейларида сўнгги вақтларда юз берган қатор йирик талончиликларнинг навбатдагиси бўлди.

 

Хусусан, аввалроқ Испаниянинг Аликанте провинциясидаги Виллена археология музейидан бронза даврига оид “Виллена хазинаси”нинг катта қисми ўғирлаб кетилганди. Ўғирланган олтин буюмларнинг қиймати камида 1,7 миллион еврони ташкил этади.

 

2025 йилда эса Лувр музейи ўғрилар ҳужумига учраганди. Ҳодиса натижасида у ердан бир нечта қадимий заргарлик буюмлари, жумладан, Франция қироллари ва императорларига тегишли тож, маржон ва тилла буюмлар ўғирланган.