Тошкент метросида поездлар ҳаракати интерваллари қисқартирилади

Янги ўқув йили бошланиши муносабати билан Тошкент метрополитенида йўловчилар оқими ортишига тайёргарлик кўрилмоқда. Бу ҳақда “Тошкент метрополитени” АЖ хабар берди.

 

Пойтахтдаги олий таълим муассасаларида ўқув машғулотларининг биринчи сменаси соат 08:00 дан бошланиши белгиланган.

 

Шу муносабат билан эрталабки ва кечки тиғиз вақтларда метрополитеннинг барча йўналишларида поездлар ҳаракати интерваллари қисқартирилади. Хусусан:

 

• Чилонзор йўналишида — 1,5–2 дақиқагача;
• Ўзбекистон йўналишида — 3 дақиқагача;
• Юнусобод йўналишида — 4 дақиқагача;
• Ер усти ҳалқа йўли йўналишида — 7–8 дақиқагача.

 

Маълум қилинишича, 2026 йил давомида Тошкент метрополитени вагон парки 14 та замонавий ҳаракат таркиби билан тўлдирилиши режалаштирилган. Ҳозиргача уларнинг 11 таси етказиб берилган, яна 3 та ҳаракат таркиби яқин кунларда олиб келиниши кутилмоқда.

 

Шунингдек, йўловчилар оқимини самарали бошқариш ва бекатларда хавфсизликни таъминлаш мақсадида тиғиз вақтларда барча 50 та метро бекатида навбатчилик тизими йўлга қўйилган.

 

Масъул ходимлардан иборат гуруҳлар эрталабки ва кечки тиғиз вақтларда бекатларда навбатчилик қилиб, йўловчиларга зарур кўмак кўрсатади.

 

Мазкур чоралар янги ўқув йили бошланиши билан кутилаётган йўловчилар оқимини самарали бошқариш, метро қатновининг барқарорлигини таъминлаш ҳамда йўловчиларга қулай ва хавфсиз хизмат кўрсатишга қаратилган.