Непалда сув тошқинлари оқибатида етказилган зарар 2,56 млрд доллардан ошди
Зарар миқдорига уй-жойлар, мулк ва инфратузилма объектларининг вайрон бўлиши билан боғлиқ йўқотишлар киритилган.
Непалда юз берган вайронкор сув тошқинлари мамлакат мулки, уй-жойлари ва инфратузилмасига камида 2,56 миллиард доллар миқдорида зарар етказгани қайд этилди. Бу ҳақда Реутерс Непал Миллий офатлар хавфини камайтириш ва бошқариш бошқармаси раҳбари Дҳарма Раж Упретига таяниб хабар берди.
Унинг маълум қилишича, табиий офат мамлакатнинг замонавий тарихидаги энг вайронкор сув тошқинларидан бири бўлган. Зарар миқдорига уй-жойлар, мулк ва инфратузилма объектларининг вайрон бўлиши билан боғлиқ йўқотишлар киритилган.
Ҳисоб-китобларга кўра, дастлабки тўрт ой давомида тиклаш ва қайта қуриш ишлари учун қарийб 52,6 миллион доллар маблағ талаб этилади. Ушбу маблағларни йўлларни тиклаш, вақтинчалик бошпаналар қуриш, электр таъминотини қайта тиклаш ҳамда аҳолига ичимлик суви етказиб беришга йўналтириш режалаштирилган.
Эслатиб ўтамиз, сув тошқини 26 август куни Непалнинг шимолий қисмида, Хитой билан чегарага яқин ҳудудда юз берган эди. Дастлабки маълумотларга кўра, Расувагадҳи чегара пунктидан тахминан 20 километр шимоли-шарқда юзага келган кўчки ортидан кучли сел оқими пайдо бўлган.
Тош ва лой аралашмасидан иборат оқим дарё ўзани бўйлаб 70 километрдан ортиқ масофани босиб ўтиб, аҳоли пунктларига зарар етказган ва катта ҳудудларни сув остида қолдирган.
Табиий офат оқибатида қурбонлар ва бедарак йўқолганлар сони бўйича маълумотлар аниқлаштирилмоқда. Зарар кўрган ҳудудларда қутқарув ва тиклаш ишлари давом этмоқда.
Расмийларнинг таъкидлашича, зарар кўлами ҳали тўлиқ баҳоланмаган. Шу сабабли табиий офат оқибатида етказилган зарарнинг якуний миқдори ўрганишлар якунлангач маълум бўлади.
