Экополиция ходими ўлими: уч нафар шахсга жиноят иши қўзғатилди

 

Сирдарё дарёсида хизмат вазифасини бажариш вақтида ҳалок бўлган Экополиция ходими Мирзо Ботиров иши юзасидан уч нафар шахсга жиноят иши қўзғатилди.

 

Бу ҳақда Бош прокуратура матбуот котиби Ҳаёт Шамсутдинов маълум қилди.

 

Экология ва иқлим ўзгариши миллий қўмитаси ҳузуридаги Давлат экологик назорат инспекцияси (Экополиция) Айдар-Арнасой кўллар тизимини назорат қилиш бўлими бош мутахассиси Мирзо Ботиров 9 сентябрь куни Сирдарё дарёси ўзанида ўтказилган тезкор рейд тадбири давомида ҳалок бўлган эди.

 

Дастлабки маълумотларга кўра, инспектор электр қармоқдан фойдаланиб, ноқонуний балиқ овлаётган шахсларнинг қаршилигига учраган ва бунинг оқибатида сувга тушиб кетган.

 

10 сентябрь куни тегишли ташкилотлар билан ҳамкорликда олиб борилган қидирув ишлари натижасида Мирзо Ботировнинг жасади топилган.

 

Мазкур ҳолат юзасидан уч нафар шахсга нисбатан Жиноят кодексининг 202-моддаси (Ҳайвонот ёки ўсимлик дунёсидан фойдаланиш тартибини бузиш), 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) ҳамда 102-моддаси (Эҳтиётсизлик орқасида одам ўлдириш) билан жиноят иши қўзғатилган.

 

Гумонланувчилар ушланган. Ҳозирда дастлабки тергов ҳаракатлари олиб борилмоқда.