Ёш оилалар учун ипотека фоизининг бир қисмини давлат қоплаб беради
“Янги Ўзбекистон ёшлари — 2030” стратегияси доирасида ёшлар учун ипотека, грант, амалиёт ва саломатлик бўйича янги чоралар белгиланмоқда.
Президент матбуот хизматининг маълум қилишича, “Янги Ўзбекистон ёшлари — 2030” стратегияси доирасида ёш оилаларни қўллаб-қувватлаш бўйича янги имтиёзлар жорий этилади.
Унга кўра, ипотека дастури орқали ёш оилаларнинг кредит фоиз харажатлари енгиллаштирилади. Хусусан, кредит ставкасининг Марказий банк асосий ставкасидан юқори бўлган қисми давлат томонидан қоплаб берилади.
Стратегияда ёшлар учун бошқа қўшимча имкониятлар ҳам назарда тутилган. Жумладан, волонтёрлик жамғармаси орқали 100 миллион сўмгача грантлар ажратилади, фаол ёшлар давлат идораларида пуллик амалиётга жалб қилинади, илғор ижодкорлар учун Президент мукофоти таъсис этилади.
Шунингдек, китоб ва Book-кафелар жойлашган “Ёшлар кўчалари” ташкил этилади ҳамда ҳудудларда ёшлар инфратузилмасининг минимал стандартлари жорий қилинади.
Стратегияда ёшлар саломатлигини мустаҳкамлаш ҳам муҳим йўналиш сифатида белгиланган. Руҳий хавф гуруҳидаги ёшлар улушини 40 фоизга камайтириш, 24 соат ишловчи психологик алоқа марказини ташкил этиш ва спорт билан шуғулланувчи ёшлар сонини 25 фоизга ошириш режалаштирилган.
Бундан ташқари, ҳар пайшанба куни ёшлар билан очиқ мулоқотлар ўтказиб борилади.
