Ўзбекистонда ногирон болалар учун кундузги парвариш хизматларини кўрсатувчи тадбиркорлар солиқлардан озод этилади
Ушбу чора 2030 йил 1 январгача амал қилади.
Ўзбекистонда ногирон болалар учун кундузги парвариш хизматларини кўрсатувчи тадбиркорлар солиқлардан озод этилади. Бу ҳақда Адлия вазирлиги хабар берди.
Солиқ кодексига киритилган ўзгартиришларга кўра, 3 ёшдан 18 ёшгача бўлган ногирон болаларга кундузги парвариш хизматларини кўрсатувчи тадбиркорлар 2030 йил 1 январгача барча турдаги солиқлардан (ижтимоий солиқдан ташқари) озод этилади. Мазкур имтиёз давлат-хусусий шериклик асосида ташкил этилган хизматларга ҳам татбиқ этилади.
Шунингдек, ота-оналар томонидан ушбу хизматлар учун ҳар бир бола бўйича ойига 3 миллион сўмгача бўлган тўловлар даромад солиғидан озод қилинади.
Бундан ташқари, “Аҳолини бандлигини таъминлаш тўғрисида”ги қонунга киритилган қўшимчаларга мувофиқ, зўравонлик ва тазйиқ қурбонлари бўлган ҳамда тегишли малака ва кўникмаларга эга аёллар «Инсон» марказлари тавсияси асосида иш қидирувчи сифатида рўйхатдан ўтказилиши мумкин.
Қонун расмий эълон қилинган кундан бошлаб кучга киради.
