Президент Шавкат Мирзиёев Россия делегациясини қабул қилди

 

Ўзбекистон Президенти Шавкат Мирзиёев 20 апрель куни Тошкент шаҳрида бўлиб ўтаётган “ИННОПРОМ. Марказий Осиё” халқаро саноат кўргазмаси доирасида Россия Федерацияси Ҳукумати Раисининг биринчи ўринбосари Денис Мантуров бошчилигидаги Россия делегациясини қабул қилди.

 

Учрашувда Татаристон, Бошқирдистон республикалари, шунингдек Ленинград, Киров, Иркутск ва Омск вилоятлари ҳамда Россиянинг йирик саноат компаниялари раҳбарлари иштирок этди.

 

Суҳбат аввалида Денис Мантуров Россия Федерацияси Президенти Владимир Путиннинг самимий саломи ва эзгу тилакларини Ўзбекистон Президентига етказди.

 

Ўзбекистон Президенти 35 дан ортиқ давлатдан 10 мингдан зиёд бизнес вакиллари иштирок этаётган «ИННОПРОМ» халқаро кўргазмаси муваффақиятли ташкил этилганини алоҳида таъкидлади.

 

Учрашувда Ўзбекистон ва Россия ўртасидаги савдо-иқтисодий ҳамкорликни янада кенгайтириш, эришилган келишувларни амалиётга татбиқ этиш масалалари муҳокама қилинди.

 

Томонлар савдо айланмасининг барқарор ўсиб бораётгани, саноат, энергетика, транспорт, металлургия, кимё, тинч атом ва бошқа муҳим соҳалардаги қўшма лойиҳалар муваффақиятли амалга оширилаётганини мамнуният билан қайд этдилар.

 

Шунингдек, саноат кооперациясини ривожлантириш, ҳудудлараро алоқаларни кучайтириш ва тадбиркорлар ўртасидаги ҳамкорликни кенгайтириш масалаларига алоҳида эътибор қаратилди.

 

Қишлоқ хўжалиги машинасозлиги, энергия самарадорлиги, сув хўжалиги, киберхавфсизлик ва сунъий интеллект каби истиқболли йўналишларда янги лойиҳаларни амалга ошириш бўйича келишувлар қўллаб-қувватланди.

 

Бундан ташқари, техник олийгоҳлар негизида иқтисодиётнинг устувор тармоқлари учун муҳандис кадрлар тайёрлаш тизимини ривожлантириш масаласи ҳам муҳокама қилинди.

 

Учрашув якунида Россия ҳудудлари ва йирик компаниялари вакиллари томонидан Ўзбекистонда янги инвестиция ва саноат лойиҳаларини амалга ошириш бўйича аниқ таклифлар тақдим этилди.