Боғча болалари ўртасида “Табиат болалар нигоҳида” расмлар танловининг финал босқичи ўтказилди

Экология ва иқлим ўзгариши миллий қўмитаси ҳузуридаги Green University да “Табиат болалар нигоҳида” республика расмлар танловининг мактабгача таълим ташкилотлари тарбияланувчилари ўртасидаги Республика босқичи ташкил этилди.

 

 

Маълумот учун, танлов Экология қўмитаси, Мактабгача ва мактаб таълими вазирлиги ҳамда Касбий таълим агентлиги билан ҳамкорликда МТТ тарбияланувчилари, умумий ўрта таълим ҳамда рассомлик ва дизайнга ихтисослаштирилган мактабларнинг 5-7, 8-10, 11-13 ва 14-16 ёшдаги ўқувчилари ўртасида ўтказилмоқда.

 

 

МТТ тарбияланувчилари ўртасидаги финал босқичида барча ҳудудлардаги босқичларда ғолиб бўлган болалар иштирок этди. Танлов давомида иштирокчилар табиатнинг ноёб манзараларини ўз нигоҳлари билан тасвирлашди ва бир-биридан бетакрор суратлар чизишди.

 

 

Якунда ўғил болалар ўртасида Тимур Алишеров 1-ўринни (Тошкент шаҳри), Салоҳиддин Шокиров 2-ўринни (Фарғона вилояти) ва Усмонжон Убайдуллаев 3-ўринни (Самарқанд вилояти) қўлга киритди. Қизлар ўртасида эса 1-ўрин Кумушой Турсунбековага (Хоразм вилояти), 2-ўрин Фотима Муродқуловага (Самарқанд вилояти), 3-ўрин эса Мубина Ҳасановага (Навоий вилояти) насиб этди. Ғолиблар муносиб тақдирланди.

 

 

Танловнинг рассомлик ва дизайнга ихисослаштирилган мактаблар ўқувчилари ўртасида республика босқичи 7 май куни, умумий ўрта таълим мактаблар ўқувчилари ўртасида ҳудудий босқичлар эса 1 майга қадар бўлиб ўтади. Ғолиб бўлган иштирокчиларнинг ишлари Самарқандда ўтказиладиган Глобал экологик фонднинг VIII ассамблеяси ва “Eco Expo Central Asia 2026” халқаро кўргазмасида тақдим этилади.

 

 

Мазкур танлов болалар ва ёшларнинг ижодий қобилиятларини ривожлантириш, уларда бадиий эстетик дидни шакллантириш, табиатга бўлган меҳр-муҳаббатни ошириш ва экологик маданиятни шакллантириш, болаларни атроф- асраш, уни гўзаллик билан идрок этиш ҳамда табиат билан уйғун яшашга ўргатиш, ёш рассомларнинг истеъдодини кашф этиш ва уларни қўллаб-қувватлашга хизмат қилиши кутилмоқда.