Тошкентда Суриядаги жангариларга қўшилишга уринган фуқаро 6 йилга қамалди
Унинг оила аъзолари ва танишларини ҳам экстремистик ғояларга даъват қилгани аниқланган.
Тошкент шаҳрида яшовчи фуқаро террорчилик фаолиятида иштирок этишга уриниш ҳамда яқинларини экстремистик ғояларга жалб қилишда айбдор деб топилиб, 6 йил муддатга озодликдан маҳрум этилди. Бу ҳақда ДХХ маълум қилди.
Тергов маълумотларига кўра, судланувчи 2018 йилдан буён Сурияда яшаб, қуролли тўдалар сафида ҳаракат қилаётган Ўзбекистон фуқаросининг таъсирига тушган. Мазкур шахс ижтимоий тармоқлар орқали собиқ қўшнилари, танишлари ва синфдошларини радикал ғояларга тарғиб қилиб келган.
Аниқланишича, тошкентлик фуқаро можаро ҳудудига чиқиб кетиш мақсадида ўз автомобилини сотган ҳамда Қозоғистон ва Туркия орқали Сурияга бориш режасини ишлаб чиққан.
Шунингдек, у оила аъзолари ва ҳамкасбларини ҳам экстремистик қарашларга оғдиришга уринган. Тинтув жараёнида ундан диний мутаассиблик ва зўравонлик ғояларини тарғиб қилувчи материаллар топилган.
Тергов давомида фуқаронинг яна тўрт нафар шахсни ёллагани, улар ҳам жанговар ҳудудга кетишга тайёргарлик кўра бошлагани аниқланган.
Суд мажлисида судланувчи айбига иқрор бўлиб, диний билим етишмаслиги ҳамда интернетдаги зарарли контент таъсирига тушиб қолганини билдирган.
Суд қарорига кўра, у Жиноят кодексининг 156-моддаси 2-қисми ҳамда 244-2-моддаси 1-қисми билан айбдор деб топилди ва 6 йил муддатга озодликдан маҳрум этилди.
Ҳуқуқни муҳофаза қилувчи органлар мазкур жиноят ишига алоқадор бошқа шахслар юзасидан тергов ҳаракатлари давом этаётганини маълум қилди.
