Сурхондарёда дарёга нефтга ўхшаш суюқлик оқиши ҳолати Экополиция томонидан ўрганилмоқда
Бойсун–Бандихон ҳудудида кузатилган сел сабаб дарёга нефть аралаш суюқлик оқиб чиқиши кузатилган.
Ижтимоий тармоқларда Сурхондарё вилоятининг Қумқўрғон туманида жойлашган дарёга нефтга ўхшаш суюқлик оқиб тушаётгани ҳақидаги хабарлар тарқалган эди.
Мазкур ҳолат Экология ва иқлим ўзгариши миллий қўмитаси Давлат экологик назорат инспекцияси (Экополиция) томонидан воқеа жойига чиққан ҳолда ўрганилмоқда.
Дастлабки ўрганишларга кўра, 2026 йил январь ойида Бойсун туманидаги Хонгаронсой ҳудудида табиий геологик жараёнлар натижасида ер остидан нефть аралаш суюқлик чиқиши кузатилган. Ушбу суюқликнинг сойга оқиб кетмаслиги учун махсус ҳовуз ҳосил қилинган.
Бироқ Бойсун туманида кузатилган сел оқибатида мазкур ҳимоя ҳовузи бузилиб, нефть аралаш суюқлик Бандихон сойига оқиб кетган. Кейинчалик ушбу оқим сув тизими орқали Сурхондарё дарёсига етиб борган.
Ҳозирда вазиятни бартараф этиш бўйича махсус техникалар жалб этилган ҳолда ишлар олиб борилмоқда. Шу билан бирга, дарёга оқиб тушган суюқлик ҳажми ва таркибини аниқлаш мақсадида икки ишчи гуруҳ ташкил этилди.
Ўрганиш ишлари давом этмоқда ва якуний натижалар юзасидан қўшимча расмий ахборот тақдим этилади.
Шунингдек, ҳолат юзасидан тегишли қонунчилик асосида айбдор шахсларга нисбатан қонунчиликка мувофиқ қатъий жавобгарлик чоралари қўлланилади.
Эслатиб ўтамиз, аввалроқ ушбу ҳолат «Ўзбекнефтгаз» АЖ фаолиятига алоқадор эмаслиги расман билдирилган эди.
