Ўзбекистонда “Янги авлод тадбиркорлари” дастури ишга туширилади
Энг яхши натижа кўрсатган минг нафар иштирокчига сертификат берилиб, уларга имтиёзли кредит ажратилади.
Ўзбекистонда ёшларни тадбиркорлик фаолиятига кенг жалб этиш, уларнинг бандлигини таъминлаш ва бизнес кўникмаларини ошириш мақсадида “Янги авлод тадбиркорлари” дастури ишга туширилади. Бу ҳақда Президентнинг “Янги Ўзбекистон ёшлари – 2030” стратегиясини 2026–2027 йилларда амалга ошириш ҳамда ёшлар бандлигини таъминлаш бўйича қўшимча чора-тадбирлар тўғрисида”ги қарорида белгиланган деб хабар беради Адлия вазирлиги.
Қарорга мувофиқ, 2030 йилгача Ёшлар ишлари агентлиги томонидан мазкур дастур амалга оширилади. У орқали 20 минг нафар ёшни тадбиркорлик фаолиятига ўқитиш режалаштирилган.
Дастур доирасида маҳаллий ва хорижий экспертлар, шунингдек, хусусий сектор вакиллари билан ҳамкорлик йўлга қўйилади. Иштирокчилар танлов асосида сараланади ҳамда уларга бизнес лойиҳани ишлаб чиқиш, маҳсулотни бозорга олиб чиқиш, савдони йўлга қўйиш ва бозорни кенгайтириш бўйича назарий ҳамда амалий билимлар берилади.
Лойиҳа якунида ёшларнинг билим ва кўникмалари синовдан ўтказилади. Натижаларга кўра, энг яхши минг нафар иштирокчига Ёшлар ишлари агентлигининг махсус сертификати топширилади.
Мазкур сертификатга эга бўлган ёшларга асосий ставкадан 50 фоизга камайтирилган фоиз ставкасида, 6 ойлик имтиёзли муддат билан 3 йилгача 500 баравар БҲМ миқдоригача кредит ажратилади.
Шунингдек, 2026 йил 1 августдан бошлаб туман фермерлар кенгашлари ҳузуридаги бухгалтерия ҳисоби марказлари ёшлар раҳбарлигидаги янги фермер хўжаликларига икки йил давомида бепул хизмат кўрсатади.
2026 йил 1 июлдан эса ёшлар томонидан ташкил этилган тадбиркорлик субъектларини электр энергияси, ичимлик суви ва канализация тармоқларига улаш билан боғлиқ давлат хизматлари харажатларининг бир қисми 10 баравар БҲМдан ошмаган миқдорда қоплаб берилади.
