Ўзбекистоннинг PISA 2025 натижаларида ижобий ўсиш қайд этилди
PISA 2025 халқаро тадқиқотида Ўзбекистон табиий фанлар бўйича 438 балл тўплаб, 91 та давлат ва таълим тизими орасида 48-ўринни эгаллади.
Ўзбекистон 91 та давлат ва таълим тизими қаторида Иқтисодий ҳамкорлик ва тараққиёт ташкилоти (OECD) томонидан ўтказилган PISA 2025 халқаро тадқиқотида иккинчи бор иштирок этди.
PISA 2025 тадқиқотида табиий фанлар устувор йўналиш сифатида белгиланган. Мазкур йўналишда ўзбекистонлик ўқувчилар 438 балл тўплаб, 91 та давлат ва таълим тизими орасида 48-ўринни эгаллади.
Таққослаш учун, PISA 2022 тадқиқотида Ўзбекистоннинг табиий фанлар бўйича натижаси 355 балл ва 80-ўринни ташкил этган. Шу тариқа, 2025 йилда ушбу йўналишдаги натижа 83 баллга ошган.
Халқаро тадқиқот доирасида республика бўйлаб тасодифий ва вакиллик танлови асосида 233 та мактаб танлаб олиниб, улардаги 15 ёшли 8 652 нафар ўқувчи иштирок этди.
PISA 2022 тадқиқотида эса Ўзбекистоннинг 202 та мактабидан 7 293 нафар ўқувчи қатнашган. Шу билан бирга, 2025 йилги тадқиқотда иштирок этган мактаблар ва ўқувчилар сони ҳам ошган.
PISA халқаро тадқиқотлари 2000 йилдан буён ҳар уч йилда бир марта ўтказиб келинади. Унда ўқувчиларнинг математика, табиий фанлар, ўқиш ва рақамли саводхонлик бўйича билим ва кўникмалари баҳоланади.
Ўзбекистоннинг PISA 2025 тадқиқотидаги натижалари мамлакатда таълим сифатини ошириш ва ўқувчиларнинг халқаро баҳолаш мезонларига мувофиқ билим ва кўникмаларини ривожлантириш борасидаги ишлар учун муҳим кўрсаткич ҳисобланади.
