Туркияда ўзбекистонлик келин тилла ўғирлагани ҳақидаги айбловларни рад этди

Туркияда ўзбекистонлик фуқаро билан боғлиқ ҳолат юзасидан суриштирув давом этмоқда. Муғла вилояти Милас туманида Ўзбекистон фуқароси М. Б. билан боғлиқ ҳолат маҳаллий ОАВ ва ижтимоий тармоқларда кенг муҳокама қилинмоқда.

 

Айрим Туркия ОАВларида М. Б. тўй маросимидан сўнг катта миқдордаги тилла ва зийнат буюмларини олиб, ғойиб бўлгани ҳақида хабарлар тарқалган эди.

Бироқ аниқланган маълумотларга кўра, М. Б. Милас ҳудудида бўлиб, ҳеч қаерга қочиб кетмаган. У ўз ихтиёри билан маҳаллий полиция бўлимига бориб, ҳолат юзасидан кўрсатма берган.

Фуқаро ўзига билдирилган даъволарни рад этган. Унинг маълум қилишича, тўйда тақилган тилла буюмлар онаси билан биргаликда қайнотасига топширилган. Қайнотаси эса кейинчалик ушбу буюмларни кредит ва бошқа қарзларини тўлаш мақсадида сотганини ёзишмаларда билдирган.

М. Б. тегишли ёзишмалар ҳамда тилла буюмларни топшириш жараёни акс этган видеоматериалларни Туркия ҳуқуқни муҳофаза қилувчи органларига тақдим этганини маълум қилган.

Ҳозирда томонларнинг ўзаро даъволари юзасидан Туркиянинг ваколатли органлари томонидан суриштирув давом эттирилмоқда.

Шу сабабли, Ўзбекистоннинг Истанбул шаҳридаги Бош консулхонаси суриштирув якунига қадар ҳолат юзасидан бир томонлама хулоса чиқариш ва тасдиқланмаган маълумотларни тарқатишдан тийилишни сўраган.

Консулхона вазиятни кузатиб бормоқда. Зарур ҳолларда ўзбекистонлик аёлга белгиланган тартибда консуллик-ҳуқуқий кўмак кўрсатилади.