Афғонистонлик қирғизлар Қирғизистонга олиб келинади — Садир Жапаров
Расмий Бишкек Афғонистонда яшайдиган этник қирғизларни Қирғизистонга олиб келмоқчи. Бу ҳақда Қирғизистон президенти Садир Жапаров маълум қилди.
“Маълум вақтдан сўнг биз барча қирғизларни кўчириб келамиз”, – деган Жапаров. Унинг сўзларига кўра, улар учун мамлакат ҳудудида алоҳида уй-жой қурилади. “Тез орада бундай уйлар ясайдиган корхона ишга тушади ва биз Афғонистондаги барча қирғизларни олиб келамиз”, – деб айтган Қирғизистон етакчиси.
Турли маълумотларга кўра, ҳозирда Афғонистонда 3-4 минг атрофида этник қирғизлар истиқомат қилади. Улар асосан Катта ва Кичик Помир ҳудудида яшайди. Бишкек сентябрда улар учун гуманитар ёрдам юборган.
Бундан аввал АҚШ Афғонистон йўналишидаги сиёсатни қайта кўриб чиқмоқчилиги ҳамда ИШИДни Афғонистон халқи қўллаб-қувватламаслиги хабар қилинганди.
Жаҳонгир Қўзиев
