Афғонистоннинг ярим аҳолисига очлик хавф солмоқда — БМТ
Ноябрь ойида Афғонистонда 23 миллион киши кескин озиқ-овқат танқислигига дуч келиши мумкин.
БМТнинг Бутунжаҳон озиқ-овқат дастури ҳамда Озиқ-овқат ва қишлоқ хўжалиги ташкилоти қўшма тадқиқоти ана шундай хулосага келди. Ташкилот сайтида айтилишича, ноябрь ойида Афғонистонда 23 миллион киши кескин озиқ-овқат танқислигига дуч келиши мумкин. Тадқиқотчилар бунга бир қанча омиллар сабаб бўлиши айтган: қурғоқчилик, қуролли низо, пандемия ва иқтисодий инқироз.
“Олдинда қиш турибди ва гуманитар ташкилотларнинг Афғонистоннинг бир қанча вилоятларига йўли ёпилади. Мамлакатнинг ҳар иккинчи фуқаросига очлик хавф солиши мумкин. Муаммонинг олдини олиш учун зудлик билан халқаро ҳамжамият аралашуви зарур, акс ҳолда Афғонистонни гуманитар ҳалокат кутади”, – дейилади ахборотда.
Бутунжаҳон озиқ-овқат дастури бош директори Цюй Дунъюйнинг маълум қилишича, қиш келмасдан туриб дарҳол ёрдам беришни тезлаштириш ҳамда унинг ҳажмини кенгайтириш зарур.
БМТ маълумотларига кўра, Афғонистонда апрелдан буён озиқ-овқат танқислигига дуч келганлар сони 37 фоизга ошган. Хавф гуруҳида 3.2 миллион болалар ҳам бор. ЮНИСЕФ миллионга яқин болалар очлик қурбонига айланиши мумкинлигидан огоҳлантирган.
Бундан аввал Хитой ташқи ишлар вазири АҚШ Афғонистонга нисбатан жорий қилинган санкцияларни бекор қилиш кераклигини айтганди. Шунингдек, Покистон “Толибон”га терроризмга қарши курашда ёрдам бераётгани хабар берилганди.
Жаҳонгир Қўзиев
