АҚШ "олов билан ўйнашяпти" (ми?)
Пентагон Пэлосининг Тайванга ташрифига тайёргарлик кўрмоқда
АҚШ мудофаа вазирлиги Конгресснинг вакиллар палатаси спикери Нэнси Пэлосининг Тайванга эҳтимолий ташрифига тайёргарлик кўрмоқда. Бу ҳақда Politico газетаси хабар берди.
Осиё бўйлаб турнега чиққан сиёсатчи бундан олдин Тайванга бориши ҳақидаги саволга аниқ жавоб бермаган ва буни хавфсизлик масаласи билан изоҳлаган. Аммо Пентагон ушбу вазиятга тайёргарликни бошлаб юборган. Газета маълумотларига кўра, барчаси режадагидек кетса, Пэлоси хоним Тайбейга ҳарбий самолётда боради.
АҚШ ҳарбийлари Пекиннинг орол яқинида ракета синовлари ўтказишидан хавфсирамоқда. Politico манбалари Тайвань яқинида учаётган Америка самолётларига тўлиқ қуролланишга топшириқ берилганини таъкидлаган.
ОАВ маълумотларига кўра, ҳозирча Пэлоси Япония, Жанубий Корея, Малайзия ва Сингапурга ташриф буюришни режалаштирган.
Аввалроқ Си Цзиньпин Жозеф Байден билан телефон мулоқоти чоғида "олов билан ўйнашмаслик"ни маслаҳат берганди. Бундан ташқари, Хитой денгиз кучлари Тайвань яқинида йирик машғулотлар бошлагани тўғрисида хабар берилганди.
