Биз нефтни қаерга сотишни биламиз – Александр Новак
Сиёсатчи Европанинг Россия нефть ва газидан воз кечолмаслигини маълум қилди.
Европа Россия нефтидан воз кечган тақдирда унинг нархи 300 долларга кўтарилади. Бу ҳақда Россия бош вазири ўринбосари Александр Новак айтган.
Новак ЕИнинг Москвага энергетик жиҳатдан боғлиқлигига эътибор қаратган. Унинг сўзларига кўра, Россия Европа истеъмол қиладиган газнинг 40 фоизини етказиб беради ва доим ишончли ҳамкор бўлиб келган.
“Европа рус газининг ўрнини тезда тўлдира олмайди. Бунинг учун йиллар керак. Ғарбнинг эҳтимолий эмбаргоси ҳақидаги гап-сўзлар эса ноаниқликни вужудга келтиради ва нархлар ошишига сабаб бўлади. Бу истеъмолчиларга сезиларли зарар етказади”, – деган Новак.
Шунингдек, у Россиянинг “Шимолий оқим -1” газ қувурини тўхтатиб қўйиш ҳуқуқи борлигини, аммо шу пайтгача буни амалга оширмаганини қайд этган. Сиёсатчи нефть нархи ҳақида гапирар экан, Москва “қора олтин” етказиб бериш бўйича кафолат беришини, энергетика билан сиёсатни аралаштирмаслигини қайд этган.
“Ғарб Россия нефть ва газидан воз кечган тақдирда молия бозорида ҳалокатли вазият вужудга келади. Нефтнинг бир баррели эса 300 долларгача кўтарилади”, –– деб маълум қилган Новак.
Шу билан бирга у Москва Европага кетаётган энергоресурсларни қаерга йўналтиришни билишини таъкидлаган.
Маълумот ўрнида: 24 февраль куни РФ Украинада махсус ҳарбий операция бошлади. Бунга жавобан Ғарб давлатлари унга қарши санкциялар жорий этди. Сўнгги кунларда Европа Москва билан энергетик ҳамкорликдан воз кечиши мумкинлиги ҳақида хабарлар тарқалмоқда. Шу билан бирга қатор ЕИ давлатлари бунга тайёр эмаслигини маълум қилган.
Аввалроқ францус энергетика компанияси Европанинг Москвага энергетик қарамлигини тан олганди.
