Биз уч қутбли дунёда яшаяпмиз — Марк Милли
АҚШ генерали қайси давлатлар куч маркази бўлиб қолаётганини маълум қилди.
Халқаро ҳамжамият юқори даражадаги стратегик беқарорлик даврига кирмоқда. Бу ҳақда АҚШ қуролли кучлари штаб бошлиқлари бирлашган қўмитаси раиси Марк Милли маълум қилди.
Унинг сўзларига кўра, ҳозирда дунёда учта йирик куч маркази мавжуд.
"Биз уч қутбли — АҚШ, Хитой ва Россия буюк давлат бўлиб қолаётган дунёда яшаяпмиз. Менинг Фикримча, кейинги 40, 50, 60 ёки 70 йил давомида янада беқарор даврни бошдан кечиряпмиз", — деган Милли.
Генерал буюк давлатларнинг тинчликни қўллаб-қувватлаши катта аҳамият касб этишини таъкидлаган.
"Барча буюк давлатлар — биз ҳам (АҚШ), Россия ва Хитой ҳам, шунингдек, Вашингтоннинг барча ҳамкор ва иттифоқчилари жуда эҳтиёткор бўлишимиз керак", — деб қўшимча қилган Милли.
Бундан аввал АҚШ генерали Россия ва Хитой билан урушга кирмаслик Вашингтоннинг асосий мақсади бўлиши кераклигини айтганди. Шунингдек, Пентагон Россияни АҚШ ва Европа учун асосий хавф сифатида баҳолагани хабар қилинганди.
Жаҳонгир Қўзиев
