БМТ Россия ва АҚШни стратегик қуроллар бўйича келишишга чақирди
Аввалроқ Вашингтон Москва билан ушбу масалада музокара ўтказишга тайёрлигини билдирганди.
Россия ва АҚШ имкон қадар тезроқ стратегик қуролларни қисқартириш тўғрисида шартнома бўйича келишувга келиши керак. Бу ҳақда БМТ бош котибининг ўринбосари Идзуми Накамицу маълум қилган.
“Бу шартнома 2026 йилгача амал қилишини биламиз. Шу сабабли улар бу муддат тугагунча келишиб олиши керак”, – деган у.
Накамицунинг фикрича, шартнома узайтирилмаса, дунёда ҳеч қандай чеклов қолмайди.
Вашингтон ва Москва Стратегик ҳужумкор қуролларни қисқартириш ва чеклаш тўғрисида шартномани 2010 йилда имзолаган. 2021 февралда уни яна беш йилга узайтирди.
Аввалроқ АҚШ Россия билан стратегик қуроллар масаласида мулоқот ўтказишга тайёрлигини маълум қилганди.
