Дунёда ҳар ўнинчи бола ишлашга мажбур бўлмоқда — БМТ
Ташкилот болалар меҳнатига бутунлай барҳам бериш энг устувор вазифа эканини қайд этди.
БМТ ташкилотининг маълум қилишича, дунёда ҳар ўнинчи бола ишлашга мажбур бўлмоқда. Бу ҳақда ташкилот матбуот хизмати хабар берди.
Маълум бўлишича, болалар меҳнатидан энг кўп қишлоқ хўжалигида фойдаланилади – 112 миллион вояга етмаган қишлоқ хўжалигида ишлайди. Бу жами ҳолатларнинг 70 фоизини ташкил этади. Болаларнинг аксарияти ферма ва плантацияларда, кўп ҳолларда ҳаёт учун хафвли бўлган шароитларда меҳнат қилади.
БМТ Озиқ-овқат ва қишлоқ хўжалиги ташкилоти бош директори Цюй Дунъюйнинг маълум қилишича, 2025 йилга келиб болалар меҳнатига бутунлай барҳам бериш БМТ нинг Барқарор ривожланиш дастурининг устувор вазифаларидан бири саналади. Аммо бунга эришиш учун жуда кам – 4 қишлоқ хўжалик мавсуми қолди.
Дунъюй қашшоқлик ва болалар меҳнатини, айниқса, қишлоқ жойларида йўқ қилишга чақирди. Бунинг учун 2025 йилга қадар самарали ҳаракат қилиш керак ва давлат даражасида қўллаб-қувватланиши зарур.
2021 йилда БМТ томонидан болалар меҳнатига барҳам бериш йили деб эълон қилинган.
Маълумот ўрнида: Ўзбекистонда сўнгги беш йилда мажбурий ва болалар меҳнати бутунлай тугатилди. Ҳозирда бу халқаро даражада эътироф этилмоқда.
Бундан аввал БМТнинг Бутунжаҳон озиқ-овқат дастури Илон Маскни очликка қарши курашда ёрдам беришга чақирганди.
Жаҳонгир Қўзиев
