Франция президенти Эммануэл Макрон мамлакатдаги сиёсий инқироз ва кучайиб бораётган мухолифат босимларига қарамай, истеъфога чиқмаслигини қатъий тарзда билдирди. У ўз лавозимида 2027 йилги президентлик муддатининг охиригача фаолият юритишни режалаштираётганини айтди.
Reuters ва бошқа халқаро ОАВ хабарларига кўра, Францияда сўнгги ҳафталарда парламентдаги сиёсий кескинлик кучайган. Ҳукумат бюджетни тасдиқлашда муаммоларга дуч келгани, шунингдек, бир неча вазирлар истеъфога чиқишга мажбур бўлгани сиёсий беқарорликни янада кучайтирди. Мухолифат партиялари — жумладан, ўнг ва чап қанот кучлари — Макрондан истеъфо талаб қилмоқда. Улар президент олиб бораётган сиёсат, хусусан, пенсия ёшини ошириш ва солиқларни кўпайтириш каби қарорлар халқ манфаатига зид эканини билдиришмоқда.
Макрон эса бу чақириқларга жавобан барқарорлик ва давлат манфаатларини устувор деб билишини айтди. Мисрда ўтказилган халқаро саммит давомида у “халқ томонидан берилган мандатга содиқ қолиш” зарурлигини таъкидлади. Президентнинг сўзларига кўра, Франция ҳозирда мураккаб иқтисодий ва сиёсий даврни бошдан кечирмоқда ва бундай пайтда раҳбарликдан чекиниш мамлакатни янада чуқур инқирозга олиб кириши мумкин.