Навоий вилоятида автобуснинг ЙТҲга учраши оқибатида ҳалок бўлганлар сони икки нафардан кўп. Бу ҳақида Zamon.uz'гa бир-биридан мустақил манбалар хабар бермоқда.
Вафот этган шахслардан бири 2017 йилда, яна бири эса 2004 йилда туғилган, яна бир қурбон эса бир оиланинг яккаю ёлғиз 20 ёшли қизи бўлган. Zamon.uz манбалардан олган ушбу маълумотларни расмий идоралар орқали tasdiqlay олмади. Бироқ уч инсон вафот этгани тасдиқланди. Шунингдек, Zamon.uz'гa автобуснинг ағдарилиб кетишига нима сабаб бўлгани бўйича ҳам баъзи маълумотлар етиб келди.
Маълумотларга кўра, автобус Навоий вилоятининг Учқудуқ туманидан Тошкентга кетаётган бўлган. Ҳайдовчи ҳаракат вақтида сув ичиш учун чалғиб, чап қўли билан бошқарувни йўқотиб, ағдарилиб кетган. Бироқ ушбу вақтда автобуснинг тезлиги қанча бўлгани номаълум.
Zamon.uz мазкур автобус ичида бўлган йўловчилардан бир билан ҳам суҳбатлашди.
“Мен Учқудуқдан чиққанман, автобуснинг 46-ўриндиғида эдим. Йўлда ухлаб кетаётганим учун бирдан нималар бўлганини англамай қолдим. Кўзимни очганимда автобус ағдарилган, мен эса пастда қолиб кетгандим. Ҳамма чиқишга ҳаракат қилди, кимдир кимдирга ёрдам берди. 10 минутлардан кейин бошқа бир автобус тўхтаб, бизга ёрдам беришди. Шундан кейин ёрдам кучлари чақирилди. Бир қиз жони узилганди шекилли, отаси бўлса керак, кўтариб олиб кетди. Мени ва бир қанча кишиларни бошқа автобусга чиқариб жўнатишди. У ерда нималар бўлганини бошқа билмайман. Ҳозир аҳволим яхши. Бироз елкам оғрияпти, қўрқдим. Юрагим тушиб қолди шекилли”, дейди йўловчи йигит.
Ҳодиса жойига энг яқин манзил Зарафшон шаҳри бўлгани боис жабрланган йўловчилар дарҳол мазкур ҳудуднинг тиббиёт бирлашмасига олиб кетилган ва керакли чоралар кўрилган. Беморлар умуртқа поғонаси, қўл, тирсак суяклари синиши ва бош мия жароҳатлари каби ташхислар билан ҳамда нисбатан қониқарли ва оғир аҳволда шифохонага ётқизилган.
ИИВ ЙҲХХ ахборот хизмати раҳбари Зойир Йўлдошевга кўра, ҳозирда ҳолат юзасидан туман ички ишлар бўлими Тергов бўлими томонидан жиноят иши қўзғатилиб, тергов ҳаракатлари олиб борилмоқда.