Илмий фаолият билан шуғулланувчи аёллар асосан Тошкент шаҳрида йиғилган
Гендер тенгликни таъминлаш стратегиясида хотин-қизларни илмий фаолиятга кенг жалб қилиш, уларнинг инновацион ғояларини, ихтирочилик, рационализаторлик фаолиятини қўллаб-қувватлаш масаласига ҳам алоҳида эътибор қаратилган, деб ёзади Сенат раиси ўзининг телеграм каналида.
Биргина ўтган йилнинг ўзида 31 минг нафардан зиёд илмий ходим илмий-тадқиқот ва тажриба конструкторлик фаолияти билан шуғулланган бўлса, уларнинг қарийб 40 фоизини аёллар ташкил этган.
Хусусан, хотин-қизларнинг 73 фоизи олий таълимда, 16,5 фоизи давлат секторида, 10 фоизи тадбиркорлик соҳасида, 0,2 фоизи нотижорат секторида илмий фаолият билан шуғулланмоқда.
Таҳлилларга кўра, илмий фаолият билан шуғулланувчи аёллар асосан Тошкент шаҳрида йиғилган (49,6 фоиз). Ҳудудларда эса илмий фаолият билан шуғулланувчилар кўрсаткичи пастлигича қолмоқда.
Илмий фаолият билан шуғулланаётган аёлларнинг 3 568 нафари илмий даражага эга бўлиб, уларнинг 707 нафари фан доктори, 2 412 нафари фан номзоди ва 449 нафари PhD илмий даражасига эга ходимлар ҳисобланади.
Ҳозирги кунда илмий-тадқиқот ишларига давлат буюртмаси талабларига мувофиқ умумий йиллик молиявий ҳажми 45,4 миллиард сўмлик 82 та илмий лойиҳа (27,8 миллиард сўмлик 57 та амалий, қарийб 17 миллиард сўмлик 25 та инновацион лойиҳа) олима аёллар томонидан бажарилмоқда.
Эслатиб ўтамиз, аввалроқ Тошкентда Марказий Осиё халқаро институтининг очилиш маросимида Танзила Норбоева Президентнинг табригини ўқиб эшиттиргани ҳамда Туркманистонда Марказий Осиё етакчи аёллари мулоқотининг форуми бўлиб ўтгани, унга Танзила Норбоева етакчилик қилгани ҳақида хабар берилганди.
Машҳура Отажонова
Бувайда туманидаги 16-умумтаълим мактаби ўқитувчиси
