Илон Маск Украинага Starlink йўлдошлари учун тизимларни бепул етказиб беришни тўхтатмоқчи
Шу муносабат билан Пентагонда мактуб юборилган.
SpaceX компанияси Пентагонни Украинага Starlink сунъий йўлдошлари учун комплексларни етказиб беришни тўхтатиши мумкинлиги ҳақида огоҳлантирди. Бу ҳақда CNN хабар берди.
Ушбу қурилмалар Украина ҳарбийлари учун катта аҳамиятга эга. Ундан интернет йўқ ҳудудларда алоқани тиклаш ва қўшинлар ҳаракатини мувофиқлаштириш мақсадида фойдаланилган.
Ҳозирда Киевга 20 минг Starlink комплекслари берилган. SpaceX асосчиси Илон Маск бу компанияга 80 миллион долларга тушганини маълум қилган.
SpaceX Пентагонга йўллаган мактубида бу каби ҳажмдаги ёрдамни бошқа етказиб бера олмаслиги ҳақида сўз боради. Шу сабабли мудофаа вазирлигидан бу лойиҳани молиялаштириш сўралган. Қайд этилишича, йил охирига қадар Украинага етказиб бериладиган тизимлар 120 миллион долларни, кейинги йил эса 400 миллион долларни ташкил этади.
Аввалроқ Starlink сунъий йўлдошлари Украинада ишламай қолгани тўғрисида хабар берилганди.
