“Миллий тикланиш” демократик партияси раиси Алишер Қодиров Женнифер Лопезнинг Тошкентдаги концертига билдирилган муносабатлар фонида дунёвийлик тамойилларига изоҳ берди. Унга кўра, агар яланғоч чиқиш “шахсий танлов” сифатида қабул қилинса, рўмол ўраш ҳам худди шундай ҳимоя қилиниши керак.
Қодировнинг таъкидлашича, Ўзбекистон дунёвий давлат бўлиб, қонун доирасида ҳар бир фуқаро ўз ҳаёт тарзини танлаш ҳуқуқига эга. У Лопезнинг концерти ёпиқ тадбир бўлгани ва кимнидир мажбурламаганини эслатиб, шунингдек, эътиқодли аёлларнинг рўмол ўраш ҳуқуқи ҳам қонун билан кафолатланганини қайд этди.
“Женнифер Лопезга қандай кийинишни ўргатмаганимиздек, рўмол ўраган аёлларга ҳам мажбуран кийиниш тартибини белгилаш тўғри эмас”, — деди Қодиров. У паспортга тушиш жараёнида аёлларнинг рўмолини ечишга мажбурлашни ҳам танқид қилиб, идентификация учун юзнинг очиқ бўлиши етарли эканини айтди.
Қодиров дунёвийлик “ишонганга ҳам, ишонмаганга ҳам тенг бўлиш” деган маънони англатишини, кучли томоннинг заиф томон устидан устунлик қилмаслиги кераклигини таъкидлади.