Кобулда ҳавога ўқ узиши оқибатида 4 киши ҳалок бўлди
“Толибон” вакиллари Кобулда ҳавога ўқ узиши оқибатида 4 киши ҳалок бўлган.
3 сентябрь куни толиблар Панжшерни тўлиқ эгаллагани ҳақида маълум қилди. Бу кейинчалик қаршилик ҳаракати вакиллари, хусусан, Афғонистоннинг собиқ вице-президенти Амрулла Солиҳ томонидан инкор қилинди. Шундай бўлса-да, “Толибон” Кобулда бутун мамлакат устидан назорат ўрнатилгани шарафига ҳавога ўқ отган. Оқибатда 4 киши ҳалок бўлди.
Ҳодисадан сўнг ҳаракат расмий вакили Забиҳулло Мужоҳид аскарларни ҳавога ўт очмасликка чақирди. Мужоҳид бу тинч аҳолига зарар етказиши мумкинлигидан огоҳлантирган.
“Толибон” кейинчалик ҳодисага алоқадор барчани жавобгарликка тортишга ваъда берди. Шу мазмундаги баёнотда айтилишича, ўқ узган аскарлардан қурол тортиб олинади.
“Толиблар етакчиси ўринбосари Муҳаммад Ёқуб ҳавога ўқ узганларга оид бир қатор фармонлар чиқарди. Эртадан бошлаб Кобул ва бошқа шаҳарларда ўт очганлардан қурол олиб қўйилади. Бу каби хатти-ҳаракатлар ғазнага зарар келтиради ва айбдорлар жавобгарликка тортилади”,- дейилади баёнотда.
Маълумот ўрнида: “Толибон” 15 август куни Кобул шаҳрини жангсиз эгаллагандан кейин бутун Афғонистонда ҳокимияти ўрнатилганини эълон қилди. Ҳозирда фақатгина Панжшер вилояти толиблар томонидан назорат қилинмаяпти. Бу ерда Аҳмад Масъуд ва Афғонистоннинг собиқ вице-президенти Амрулла Солиҳ бошчилигида қаршилик фронти тузилган.
Эслатиб ўтамиз бундан аввал Панжшер вилоятидаги тўқнашувларда 300дан кўпроқ толиблар ҳалок бўлгани хабар қилинган эди
