Ллойд Остин: Украинага 20 миллиард долларлик ҳарбий ёрдам бердик
АҚШ мудофаа вазири Киев қанча пайт қўллаб-қувватланиши масаласига ойдинлик киритди.
АҚШ Украинани қўллаб-қувватлашда давом этади. Бу ҳақда Пентагон раҳбари Ллойд Остин маълум қилди.
“Ҳозирга қадар биз Украинага 20 миллиард долларлик ёрдам бердик. Биз Украинага қанча керак бўлса, шунча кўмак берамиз”, – деган мудофаа вазири.
Украинадаги ҳарбий можаро бошлангач, Вашингтон Киевнинг асосий ҳарбий донорига айланди. Украин армияси олаётган асосий ҳарбий техникалар АҚШ томонидан етказиб берилмоқда.
Конгрессга оралиқ сайловлар арафасида айрим кузатувчилар республикачилар партияси ғалаба қозонган тақдирда Украинага ҳарбий ёрдам бериш камайишини айтганди. Аммо ўтган ҳафтада партия буни инкор қилиб, фақатгина кўмак устидан назорат кучайтирилишини маълум қилганди.
