Марк Цукерберг Facebook собиқ менеджери Фрэнсис Хауге айбловини беъманиликдан бошқа нарса эмас, деб атади

 

 

“Биз хавфсизлик, тинчлик ва руҳий саломатлик каби масалалар жуда муҳим эканини чуқур ҳис қиламиз ва англаймиз”, — деган Цукерберг Facebook саҳифасидаги хабарида.

 

Унинг ёзишича, Хаугеннинг сўзлари беъманиликдан бошқа нарса эмас.

 

“Биз агар тадқиқотларни инкор этсак, нега унда бу муҳим саволларга жавоб топиш учун соҳада етакчи бўлган тадқиқотлар дастурини яратдик? Агар биз зарарли контентга қарши курашиш ҳақида қайғурмасак, нега унда шу соҳадаги бошқа ҳар қандай компаниядан кўпроқ одам ёлладик?”, — деган у.

 

Цукерберг фикрини давом эттириб “Бунинг ортида  биз гўё даромадни хавфсизлик ва тинчликдан устун қўямиз, деган айблов бор. Ҳолбуки, бу бизга нисбатан туҳмат ва ёлғондан бошқа нарса эмас”, деб ёзган.

 

Маълумки, 4 октябрь куни бутун дунёда интернетда узилишлар кузатилди. Дастлаб Facebook, WhatsApp ва Instagram'да бошланган муаммо кейинчалик Google хизматлари, Twitter, Tiktok ва Zoom'га ҳам таъсир қилди. Facebook, WhatsApp ва Instagram'нинг бир соат ишламаслиги жаҳон иқтисодиётига 161 миллион доллар зарар етказди. Умуман олганда Facebook акциялари 5 фоизга пасайди.

 

Facebook раҳбари бу ҳақда ҳам ёзиб, ҳодисани “сўнгги йиллардаги энг ёмон ўчиш”, деб баҳолади. У компания сўнгги 24 соатини ўз тизимларини кучайтириш ҳақида фикр юритишга сарф қилганини таъкидлади.

 

Шарофат Маҳмудова