Microsoft эндигина Windows 11 операцион тизими учун янги функцияларни ишга туширишга ҳозирланаётган бир пайтда, ишқибозлар ОТнинг сир тутилган хусусиятларини фош этди.
Маълумот учун: бир неча кун аввал Microsoft Windows 11 учун янги экспериментал функцияларни ишга туширишни режалаштираётгани ҳақида маълум қилган. Бироқ ўшанда тафсилотларни ошкор қилмаганди.
Кашф этилган янгиликлардан бири — Windows 11'да иш столи фон расмларига қўшилиши мумкин бўлган стикерлардир. Фойдаланувчилар одатда хабар алмашиш иловаларида топиладиган стикерларни танлаши ҳамда уларни иш столи орқали таҳрирлаш мумкин.
Яна бир янгилик — бу планшет режими. Компания Windows 11 да анъанавий планшет режимининг кўп функцияларидан воз кечганди. Аммо вазият тез орада ўзгариш эҳтимолидан ҳам ҳоли эмас.
Хусусан, вазифалар панелида "Қурилмани планшет сифатида ишлатишда вазифалар панелини автоматик яшириш" номли янги параметр пайдо бўлади.
Бундан ташқари, созламаларда янги "Экологиявийлик" бўлими мавжуд, у қурилма учун энергияни тежаш ва қайта ишлаш имкониятлари бўйича тавсиялар беради. Бу функциялар ҳозирча Windows 11 синаб кўрувчиларининг кўпида мавжуд эмас. Яқин вақтларда кенг кўламли синовлар бошланиши кутилмоқда.
Чўлпоной Аҳмедова