БМТ Бош Ассамблеяси доирасида Ўзбекистон Республикаси Президенти Шавкат Мирзиёев Албания Республикаси Президенти Байрам Бегай билан учрашув ўтказди.
Мулоқотда сиёсий-дипломатик, савдо-иқтисодий ва маданий-гуманитар соҳаларда ўзаро манфаатли ҳамкорликни ривожлантириш масалалари кўриб чиқилди.
Томонлар икки томонлама муносабатларни сифат жиҳатидан янги босқичга олиб чиқишга қаратилган саъй-ҳаракатларни кучайтириш зарурлигини таъкидладилар. Бу борада сиёсий мулоқот ва иқтисодий ҳамкорликнинг янги механизмларини жорий этиш муҳимлиги қайд этилди.
Савдо ва инвестиция соҳаларидаги салоҳиятни рўёбга чиқариш, қишлоқ хўжалиги, озиқ-овқат саноати, транспорт ва бошқа устувор йўналишларда қўшма лойиҳаларни амалга ошириш масалаларига алоҳида эътибор қаратилди.
Шунингдек, учрашувда минтақавий ва халқаро кун тартибидаги долзарб масалалар юзасидан фикр алмашилди.