Бугун, 15 октябрь куни Президент Шавкат Мирзиёев Саудия Арабистонининг етакчи компаниялари раҳбарлари билан учрашув ўтказди. Учрашувда икки давлат ўртасидаги ҳамкорлик сўнгги йилларда янги, стратегик босқичга кўтарилгани таъкидланди.
Таъкидланишича, ҳозирда қўшма лойиҳалар портфели 27 миллиард доллардан ошган. Фақат жорий йилнинг ўзида 2 миллиард доллар инвестиция ўзлаштирилган.
Ҳар ҳафтадаги 60 тадан зиёд авиақатновлар амалга оширилмоқда.
Саудиянинг ACWA Power компанияси 15 миллиард долларлик шамол ва қуёш электр станциялари қуриш лойиҳаларини амалга оширмоқда.
Шунингдек, Data Volt компанияси Тошкентда замонавий дата-марказ қуриш ишларини бошлаган. Miahona компанияси сув таъминоти ва чиқинди сувларни тозалаш лойиҳаларида, жумладан Қорақалпоғистонда фаол иштирок этмоқда.
Президент Шавкат Мирзиёев таъкидлаганидек, саудияликлар билан ҳамкорлик нафақат иқтисодий ўсишга, балки Янги Ўзбекистоннинг технологик ва экологик барқарор келажагини қуришга хизмат қилади.