Ўзбекистонда талабалар контракт тўловини иш берувчи ҳисобидан қоплаш тартиби жорий этилди
Талабалар ва иш берувчилар ўртасида уч томонлама шартнома асосида ҳамкорлик йўлга қўйилди.
Ҳукумат қарори билан “Олий таълим ташкилотлари талабаларининг буюртмачилар билан ҳамкорлигини ташкил этиш тартиби тўғрисида”ги низом тасдиқланди. Бу ҳақда Адлия вазирлиги маълум қилди.
Мазкур низом бакалавриат йўналишида 2-курс ва ундан юқори босқичда таҳсил олаётган талабаларнинг контракт тўловларини иш берувчилар томонидан қоплаб бериш, шунингдек, таълим якунлангач уларни ишга қабул қилиш тартибини белгилайди.
Низомга мувофиқ, олий таълим ташкилотлари, талабалар ва буюртмачи ўртасида уч томонлама шартнома тузилади. Буюртмачи сифатида ходимлар сони камида 50 нафар бўлган ёки қиймати камида 1 миллион АҚШ доллари миқдоридаги инвестиция лойиҳаларига эга вазирликлар, идоралар ва ташкилотлар иштирок этиши мумкин.
Талабалар ҳар йили 20 сентябрга қадар саралашда иштирок этиш учун олий таълим ташкилотига электрон ариза топширади ҳамда ўзлаштириш кўрсаткичлари (GPA) тўғрисидаги маълумотномани илова қилади. Ариза топширувчи талабгорларнинг жорий ўқув йилидаги GPA кўрсаткичи камида 3,0 бўлиши лозим.
Танлов комиссияси ҳар йили 15 октябрга қадар талабгорларни суҳбат асосида саралаб олади. Саралаш жараёнида буюртмачи вакилининг хулосаси асосий мезон ҳисобланади.
Уч томонлама шартнома тузган ва таълимни муваффақиятли якунлаган талабалар ўқишни битиргач, буюртмачи томонидан белгиланган тартибда ишга қабул қилинади.
