Ўзгидромет агентлигининг хабарида кўра, 5 январь куни Угам–Чатқол тоғ тизмасининг бориш қийин бўлган ҳудудида жойлашган “Oygaing” юқори тоғли метеорологик кузатув станциясида хизмат олиб бораётган ходимнинг аҳволи кескин ёмонлашган. Бу ҳақда Ўзгидромет раҳбарияти Мудофаа вазирлигига мурожаат қилиб, уни зудлик билан эвакуация қилиш зарурлигини маълум қилган. Бу ҳақда Мудофаа вазирлиги хабар берди.
Шундан сўнг Мудофаа вазирлиги Ҳарбий-ҳаво кучларининг навбатчи қидирув-қутқарув экипажи жалб этилган. Мураккаб рельеф ва қоронғу вақтга қарамай, вертолёт ёрдамида тунги қутқарув амалиёти муваффақиятли амалга оширилган ва ходим тезкорлик билан Чирчиқ шаҳридаги тиббиёт муассасасига етказилган.
Маълум қилинишича, эвакуация қилинган шахс — Ўзгидромет агентлигининг “Oygaing” қор кўчки станцияси бошлиғи Р. Ибрагимов бўлиб, унга Чирчиқ шаҳридаги тез тиббий ёрдам марказида ўз вақтида биринчи тиббий ёрдам кўрсатилган.
Айни пайтда ходимнинг аҳволи барқарор, у малакали шифокорлар назоратида экани айтилмоқда. Ўзгидромет томонидан барча зарур дори-дармонлар ва даволаниш харажатлари билан таъминланаётгани билдирилди.