Париж-2024 Олимпиадасида гендер можароси билан танилган Жазоир боксчиси Иман Ҳелиф спортни тарк этгани ҳақидаги хабарлар спорт оламида катта резонанс келтириб чиқарди. Собиқ менежерининг маълум қилишича, Ҳелиф бокс билан шуғулланишни тўхтатиб, Франциянинг Нитса шаҳридаги клубини ҳам тарк этган. Клуб унга профессионал шартнома таклиф қилмагани билдирилмоқда. Бу ҳақда Реутерс нашри хабар берди.
Бироқ спортчининг ўзи бу хабарларни рад этди. У Facebook саҳифасида собиқ менежерининг баёнотларини “ҳақиқатга тўғри келмайдиган” ва “ишончни суиистеъмол қилган” сўзлар сифатида баҳолаб, спортни тарк этиш нияти йўқлигини таъкидлади.
Шу билан бирга, гендер масалалари атрофидаги баҳслар давом этмоқда. Жаҳон бокс федерацияси (Ворлд Бохинг) жорий йил сентябрь ойида бўлиб ўтадиган жаҳон чемпионати олдидан барча аёл боксчилар учун мажбурий гендер тестини жорий этганини эълон қилди. Таиванлик Лин Ю-тинг эса тестлар жорий этилишига қарамай, мусобақада қатнашиш режасидан воз кечмаганини маълум қилди.
Жаҳон чемпионати 4–14 сентябрь кунлари бўлиб ўтади. Бу мусобақа World Boxing томонидан ташкил этиладиган биринчи йирик турнир бўлиб, Париж-2024 Олимпиадасидан кейин ҳам гендер масаласи атрофидаги тортишувлар давом этмоқда.