Қанча афғон қочқини ватанига қайтди?
Афғонистоннинг қочқинлар бўйича масъул вазирлиги бу тўғрисида маълумот берди.
Сўнгги олти ойда ярим миллиондан ортиқ афғонлар ватанига қайтиб келди.
Бу ҳақда Khaama ахборот агентлиги хабар берди.
"Толибон" ҳукуматидаги қочқинлар ва репатриация вазирлиги маълумотларига кўра, охирги ярим йил ичида 550 минг қочқин Афғонистонга қайтган. Шундай бўлса-да, хорижда 7 миллион афғонистонлик қочқин борлиги маълум қилинган.
Шунингдек, вазирлик мамлакат ичида яшаш жойини ўзгартиришга мажбур аҳоли сонини ҳам келтирган. Жумладан, Афғонистондаги нотинч сиёсий вазият ва иқтисодий қийинчиликлар туфайли 3 миллион киши ички қочқинга айланган.
Маълумот ўрнида: 2021 йил август ойида "Толибон" Афғонистонда марказий ҳокимиятни эгаллади. Шундай кейин миллионлаб афғонлар мамлакатни тарк этган. Уларнинг аксарияти Эрон ва Покистонда тўпланган. Яна бир қисми Ғарб давлатларига эвакуация қилинди.
Аввалроқ Покистон бош вазири нима учун "Толибон" ҳокимиятини тан олмаслигини маълум қилганди.
