Уч кунлик мусобақанинг охирги кунида иштирокчилар қиличбозликнинг сабля йўналиши бўйича жамоавий баҳсларда ғолиблик учун кураш олиб боришди. Жаҳон кубогида мамлакатимиз шарафини ҳимоя қилган Ш.Мамутов, П.Генжебаев, Б.Расулов ҳамда Ж.Душамбоевлардан иборат қиличбозларимиз финалгача бўлган йўлни мағлубияциз босиб ўтишди.
Ҳал қилувчи баҳсда вакилларимиз жаҳон кубогини кўтаринки руҳда ўтказган мисрлик қиличбозларга қарши жанг қилишди, бироқ якунда омад африкалик спортчиларга кулиб боқди ва ҳамюртларимиз кумуш медал билан чекланишди. 3-ўрин учун кечган баҳсларда россиялик қиличбозлар полшалик рақибларидан устун келишди.
Ёшлар ўртасида Жаҳон кубоги
Сабля, жамоавий баҳслар:
1. Миср терма жамоаси,
2. Ўзбекистон терма жамоаси,
3. Россия терма жамоаси.
Шу тариқа, қиличбозларимиз ёшлар ўртасида жаҳон кубоги баҳсларини битта кумуш ва иккита бронза медали билан якунлашди.
Эслатиб ўтамиз, бунгача рапирачиларимиз жамоавий дастурда ва саблячимиз Пазил Генжебаев яккалик баҳсларида бронза медали билан тақдирланишган эди.
Аввалроқ Тошкентда қиличбозлик бўйича жаҳон кубогига старт берилгани ва Халқаро қиличбозлик федерацияси президентлигига Алишер Усмоновнинг номзоди кўрсатилгани ҳақида хабар берилганди.
Жамшидбек Амиров