Қозоғистон афғон аёлларига "қўл чўзди"
Афғон судья ва депутат аёллари мамлакатни тарк этишга муваффақ бўлди.
Қозоғистон орқали афғонистонлик бир гуруҳ аёллар учинчи давлатларга эвакуация қилинди. Бу ҳақда мамлакат ТИВ хабар берди.Хабарда айтилишича, бу аёллар собиқ парламент аъзолари ва судьялардан иборат бўлган. Улар Олма-Ота аэропорти орқали бошқа давлатларга олиб кетилган.
“Қозоғистон Республикасининг гуманитар соҳадаги халқаро мажбуриятларига асосан, давлат раҳбари афғон аёллари – судьялар ва парламент вакиллари – ва уларнинг оила аъзоларига транзит коридори тақдим этиш тўғрисида қарор қабул қилди”, – дейилади баёнотда.
Қозоғистон бу борада халқаро ва ноҳукумат ташкилотлар билан ҳамкорлик қилган.
Собиқ афғон судья, депутат ва полициячи аёллари “Толибон” ҳокимият тепасига келгандан кейин “алоҳида хавф гуруҳи”га кирган. Кўплаб вилоятларда собиқ аёл хизматчилар ҳаётини сақлаб қолиш мақсадида яширин равишда яшаётгани айтилади.
Аввалроқ Хитой ташқи ишлар вазири АҚШ Афғонистонга нисбатан жорий қилинган санкцияларни бекор қилиш кераклигини айтганди. Шунингдек, Афғонистоннинг ярим аҳолиси очликка дучор бўлиши мумкинлиги хабар қилинганди.
Жаҳонгир Қўзиев
