Қозоғистон президенти Қосим-Жўмарт Тўқаев оммавий ахборот воситалари, телекоммуникация тармоқлари ва онлайн платформаларда ЛГБТ тарғиботи ҳамда педофилияни тақиқлашни назарда тутувчи қонунни имзолади. Бу ҳақда Оқўрда матбуот хизмати хабар берди.
Қонунга кўра, ноанъанавий жинсий муносабатларни тарғиб қилувчи ноқонуний контентни тарқатганлик учун тахминан 140 АҚШ доллари миқдорида жарима белгиланади. Агар қоидабузарлик такроран содир этилса, жарима миқдори икки баравар оширилади ёки 10 суткагача маъмурий қамоқ жазоси қўлланиши мумкин.
Сенатнинг ижтимоий-маданий ривожланиш ва фан масалалари қўмитаси хулосасида таъкидланишича, ушбу нормалар болаларни уларнинг соғлиғи ва ривожланишига зарар етказувчи ахборотдан ҳимоя қилиш мақсадида жорий этилмоқда. Чекловлар жамоат жойлари, ОАВ, телекоммуникация тармоқлари ва онлайн платформаларга татбиқ этилади.
Қозоғистон маданият ва ахборот вазири ўринбосари Евгений Кочетов тарғибот деганда “айнан ижобий баҳо бериш” тушунилишига ойдинлик киритди. Адлия вазири ўринбосари Бўтагўз Жакселекованинг таъкидлашича эса, мазкур тақиқ халқаро қонунчиликка зид эмас бўлиб, фақат ЛГБТни оммавий тарғиб қилишга қаратилган.