Сербия Давлат инвестициялари вазири ва Сербия прогрессив партияси ижроия қўмитаси раиси Дарко Глишич жонли эфирда саломатлиги кескин ёмонлашгани туфайли шифохонага олиб кетилди.
Маълумотларга кўра, ҳодиса Pink телеканалидаги эрталабки кўрсатув вақтида содир бўлган. Кўрсатув давомида Глишичнинг ҳушёрлигида ўзгаришлар кузатилган — у гапира бошлаганда сўзлари тушунарсиз эшитилган, юзида асимметрия пайдо бўлган. Бу ҳолат жонли эфир пайтида содир бўлгани учун дастур дарҳол тўхтатилган.
Вазир зудлик билан Сербия клиник марказига етказилган. Сербия соғлиқни сақлаш вазири Златибор Лонкар расмий баёнот билан чиқиб, қуйидагиларни маълум қилган:
«У жонли эфир пайтида ҳушини йўқотди ва дарҳол шифохонага олиб кетилди. Ҳозирда зарур диагностика ишлари олиб борилмоқда, терапия бошланган. Инсультдан кейинги илк соатлар ҳал қилувчи аҳамиятга эга. Барча чоралар кўрилмоқда, аҳволи жиддий, аммо тиббиёт ходимлари бор кучини сарфлаяпти.»
Маълум қилинишича, Сербия Президенти Александр Вучич воқеадан хабар топиши билан дарҳол шифохонага шахсан борган.
Манбаларга кўра, Глишич Президент Вучичнинг энг яқин ва ишончли ҳамкорларидан бири сифатида таърифланади.