Маълум қилинишича, фармон Мустақиллик байрами арафасида давлат томонидан олиб борилаётган инсонпарварлик сиёсатининг амалий тасдиғи сифатида қабул қилинган.

 

Фармонга мувофиқ, Конституциянинг 93-моддаси 23-бандига (Ўзбекистон Президенти амнистия тўғрисидаги ҳужжатларни қабул қилиш ҳақида Ўзбекистон Республикаси Олий Мажлисининг Сенатига тақдимнома киритади ва Ўзбекистон Республикасининг судлари томонидан ҳукм қилинган шахсларни афв этади) асосан содир этган жинояти учун жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 215 нафар шахс афв этилган.

 

Афв этилган шахсларнинг 3 нафари асосий жазодан озод этилди, 127 нафари жазони ўташдан муддатидан илгари шартли озод қилинди, 12 нафарининг озодликдан маҳрум этиш жазоси енгилроқ жазо билан алмаштирилди. Шунингдек, 73 нафар шахсга тайинланган озодликдан маҳрум этиш жазоси муддатлари қисқартирилган.

 

Афв этилганларнинг 14 нафарини аёллар, 12 нафарини 60 ёшдан ошган эркак, 69 нафарини чет давлат фуқаролари, 15 нафарини тақиқланган ташкилотлар иштирокчилари ташкил этади.

 

Фармон ижроси юзасидан афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш бўйича масъул вазирлик ва идораларга тегишли топшириқлар берилди.

 

Аввалроқ Ўзбекистон мустақиллигининг 30 йиллик байрамини нишонлашга тайёргарлик кўриш муносабати билан 30 августдан бошлаб Тошкент метрополитенидаги поездлар қатнови янги жадвал бўйича амалга оширилиши ҳақида хабар берилганди.