Ўзбекистон Республикаси Президенти Шавкат Мирзиёев 6 ноябрь куни Вашингтон шаҳрига амалий ташрифи доирасида Оқ уйда Америка Қўшма Штатлари Президенти Доналд Трамп билан учрашув ўтказди.
Учрашувдан аввал давлатимиз раҳбари Оқ уйнинг Фахрий меҳмонлар китобига эсдалик учун қайд ёзиб қолдирди.
Овал ҳонада ўтган музокараларда Ўзбекистон ва АҚШ ўртасидаги стратегик шерикликни янада мустаҳкамлаш, сиёсий мулоқотни фаоллаштириш, савдо-иқтисодий, инвестициявий ҳамда маданий-гуманитар ҳамкорликни кенгайтириш масалалари атрофлича муҳокама қилинди.
Жорий йил сентябрь ойида Нью-Йоркда олий даражада эришилган келишувларни амалиётга татбиқ этиш масалаларига алоҳида эътибор қаратилди. Томонлар глобал ва минтақавий кун тартибидаги долзарб масалалар, жумладан, “C5+1” форматда Марказий Осиё–АҚШ ҳамкорлигини янада ривожлантириш истиқболларини кўриб чиқдилар.
Президент Шавкат Мирзиёев Доналд Трампни ички ва ташқи сиёсатда қўлга киритаётган юксак натижалари билан табриклаб, халқаро можароларни тинч йўл билан ҳал этиш борасидаги шахсий саъй-ҳаракатларини юқори баҳолади.
Ўз навбатида, АҚШ Президенти Ўзбекистон етакчисининг ташриф доирасида АҚШ ҳукумати, етакчи компаниялар ва молиявий институтлар билан ўтказган мазмунли учрашувларини мамнуният билан қайд этди.
Томонлар қўшма ташаббус ва лойиҳаларни илгари суриш учун самарали институционал механизмларни яратиш ва такомиллаштириш муҳимлигини таъкидладилар.
Учрашув якунида Президент Шавкат Мирзиёев Доналд Трампни ўзи учун қулай вақтда Ўзбекистонга расмий ташриф билан келишга таклиф этди.