Шавкат Мирзиёев Вашингтонда АҚШ Конгресси вакиллари билан учрашув ўтказди
Учрашувда Ўзбекистон–АҚШ стратегик шериклиги, кокуслар фаолияти ва ҳудудлараро алоқаларни кучайтириш масалалари муҳокама қилинди.
Президент Шавкат Мирзиёев 5 ноябрь куни Вашингтон шаҳрига ташрифи доирасида АҚШ Конгресси Вакиллар палатаси аъзолари Билл Хайзенга, Керол Миллер ва Сидни Камлагер-Давнини қабул қилди.
Учрашувда Ўзбекистон ва Америка Қўшма Штатлари ўртасидаги стратегик шерикликни янада чуқурлаштириш, парламентлараро мулоқотни кенгайтириш ҳамда амалий ҳамкорликни ривожлантириш масалалари муҳокама қилинди.
Томонлар қонун чиқарувчи органлар ўртасидаги алоқалар сўнгги йилларда сезиларли фаоллашганини қайд этдилар. Хусусан, АҚШ Конгрессида Ўзбекистон бўйича кокус самарали фаолият юритаётгани, кокус ташаббуси билан ҳар йили ўтказилаётган “Ўзбекистон кунлари” икки томонлама муносабатларни мустаҳкамлашга хизмат қилаётгани алоҳида эътироф этилди.
Мулоқот давомида Конгресснинг олий даражада эришилган келишувларни, энг аввало савдо-иқтисодий, инвестициявий ҳамда маданий-гуманитар йўналишлардаги ҳамкорликни кенгайтиришга қаратилган ташаббусларни қўллаб-қувватлаши муҳим экани таъкидланди.
Ҳудудлараро алоқаларни кучайтириш масаласига алоҳида эътибор қаратилди. Жумладан, Ғарбий Виржиния, Мичиган ва Калифорния штатлари билан савдо, инвестиция, таълим ва инновациялар йўналишларида ҳамкорликни йўлга қўйиш истиқболлари кўриб чиқилди.
Учрашув якунида АҚШ Конгресси делегациясининг Ўзбекистонга ташрифини ташкил этиш, шунингдек, икки давлат ҳудудлари раҳбарлари ҳамда ишбилармонлар делегацияларининг ўзаро ташрифларини амалга оширишга келишиб олинди.
