Швеция қирғоқ қўриқлаш хизмати “Шимолий оқим”да газ сизиб чиқаётган тўртинчи нуқтани аниқлади. Бу ҳақда “Медуза” хабар берди.
Швеция денгиз маъмурияти маълумотларига кўра, гап “Шимолий оқим-2” ўтказгичи ҳақида кетмоқда. Сизиб чиқиш нуқтаси қироллик иқтисодий зонасида содир бўлган. Оқибатида диаметри 200 метргача бўлган газ кўпиклари вужудга келган.
26 сентябрь куни “Шимолий оқим” ва “Шимолий оқим-2” ўтказгичларида катта миқдорда газ сизиб чиқиши аниқланди. Қатор Европа давлатлари, хусусан, Дания ва Польша бунга қўпорувчилик ҳаракати сабаб бўлганини айтмоқда. Германия ва Швеция ҳам ўтказгичларга саботаж натижасида зарар етказилганини таъкидлаган.
Оқибатда “Шимолий оқим”даги газ босими пасайиб кетди. Бу Европа ва Россия ўртасидаги “энергетик уруш” авж олган бир пайтда содир бўлмоқда. Брюссель ва Москва ҳодиса ортидан денгиз тубидаги газ ўтказгичлари бутунлай ишдан чиқиши мумкинлигидан хавотир билдирган.
Россия-Украина можароси бошлангач, “Шимолий оқим-2”ни сертификатлаш тўхтатиб қўйилди. Германия ҳукумати ушбу лойиҳа ишга тушмаслигини маълум қилган.