Токио-2020 кундалигидан:  Учинчи кун беллашувлари қандай давом этмоқда?

 

Ҳамюртимиз илк босқичда доминиканлик рақибини мағлуб этди. Моисес Эрнандесга қарши кечган баҳс 17:7 ҳисоби билан якунланди. Шу тариқа ҳамюртимиз мусобақадаги иштирокини давом эттирадиган бўлди. Вакилимиз чорак финалда озарбайжонлик Милад Беги билан беллашади.

Ўзбекистонлик яна бир таэквондочи  Олимпия ўйинларидаги иштирокини бошлади.  Нигора Турсунқулова (-67 кг) хитойлик рақибаси билан куч синашди. У муосасиз кечган жангларда кучли рақибаларидан бири хитойлик Жанг Менгю билан баҳслашди. Асосий вақт дуранг билан якунлангач, ғолиб қўшимча бўлимда аниқланди. Олтин очко учун кечган баҳсда хитойлик таэквондочи устун келди. Энди Менгю финалга чиққан тақдирда ҳамюртимиз бронза медали учун курашиш имкониятини сақлаб қолади.

 Қиличбозимиз Зайнаб Дайибекова ҳам Токио-2020  ўйинларидаги муваффақиятли иштирокини давом эттирмоқда. Бироз аввал у навбатдаги рақибини ҳам мағлуб этди. Иккинчи даврада ҳамюртимизга Осиё ўйинлари финалчиси хитойлик Ятси Шао рақиблик қилди. Дайибекова ушбу беллашувни ҳам кўнгилдагидек ўтказиб, 15:10 ҳисобида устун келди. Кейинги даврада Зайнаб Италия ва Жанубий Корея вакиллари ўртасидаги жанг ғолибига қарши курашади.

 

Дзюдо бўйича Ўзбекистон терма жамоаси аъзоси Ҳикматуллоҳ Тўраев Олимпиададаги ўз иштирокини ғалаба билан бошлади. -73 килограмм вазн тоифасидаги спортчи илк даврада германиялик Игор Вантдекени мағлубиятга учратиб, кейинги босқичга йўлланма олди. Кейинги босқичда Ҳикматуллоҳ кореялик Ан Чангримга қарши татамига чиқади.

 

Ҳозиргина амалдаги Олимпия чемпиони Шаҳобиддин Зоиров илк жангини ўтказди . Рио-2016 Олимпиадаси ғолиби Шаҳобиддин Зоиров (-52 кг) туркиялик Батухан Чифтчини 5:0 ҳисобида мағлуб этди. Амалдаги Олимпия ва жаҳон чемпиони Зоиров рақибига деярли имконият қолдирмади. Ҳатто, иккинчи раундда Чифтини нокдаун ҳолатига тушуришга ҳам улгурди. Баҳсни бошқариб борган ҳакамларнинг барчаси унинг ғалабасини эътироф этишди.  Шаҳобиддин Зоиров кейинги даврада Кабо-Верде вакили Давид Де Пинага қарши рингга кўтарилади.