“Толибон” ҳаракати тўйларда мусиқани тақиқлаб қўйди
“Толибон” ҳаракати тўйларда мусиқани тақиқлаб қўйди. Бу ҳақда “Afghanistan International” телеканали маълумотларига асосланиб, “ТАСС” хабар бермоқда.
Ҳаракат афғон тўйларига оид янги қоидалар ишлаб чиққан. Унга кўра, энди тўй маросимларида жонли мусиқа чалинмайди. Бу қарор собиқ аёллар вазирлиги ўрнида тузилган “Ахлоқ полицияси” томонидан қабул қилинган.
Бундан ташқари, тўй зиёфатидан олдин никоҳ ўқитиш тақиқланди. Шунингдек, аёллар ва эркаклар алоҳида ўтириши белгилаб берилган. “Afghanistan International”нинг ёзишича, аксарият афғонлар ҳаётида тўй энг муҳим ҳодиса ҳисобланади. Одатда ушбу маросим уч кун давом этади.
Маълумот учун, 15 август куни Ашраф Ғани президентлик лавозимидан воз кечди. Шундан кейин “Толибон” ҳокимиятни эгаллади. 7 сентябрь куни мамлакатда янги ҳукумат тузилди.
Бундан аввал Қатар толибларни танқид қилгани ҳамда Британия махсус вакили “Толибон” билан учрашгани хабар қилинганди.
Жаҳонгир Қўзиев
