"Толибон" олий раҳбари "соядан чиқмоқда"
Хайбатулло Охунзода Қандаҳордаги мадрасада нутқ сўзлаган.
“Толибон” олий раҳбари Хайбатулло Охунзода илк бор омма олдида чиқиш қилди. Бу ҳақда Pajhwok ахборот агентлигига таяниб, “ТАСС” хабар берди.
Маълумотларга кўра, Охунзода Қандаҳор шаҳридаги мадрасалардан бирида нутқ сўзлаган. Ушбу тадбирнинг бирор-бир даражада ёритилиши қатъиян тақиқланган. Аммо кўп ўтмай, ижтимоий тармоқларда Охунзоданинг мадрасадаги нутқи ёзиб олинган аудиоёзув тарқалиб кетган.
Таъкидланишича, толиблар олий раҳбари ўз чиқиши давомида сиёсий мавзуларга тўхталмаган. Нутқ асосан диний масалаларга тааллуқли бўлган. Pajhwok агентлиги маълумотларига кўра, Охунзоданинг мадрасада бўлган пайти Қандаҳорда хавфсизлик чоралари кучайтирилган.
Маълумот ўрнида: Хайбатулло Охунзода 7 октябрь куни “Толибон” томонидан Афғонистон олий раҳбари деб эълон қилинди. Аммо баъзи экспертлар Охунзодани бир неча йил олдин вафот этган деб ҳисоблашади. Унинг ўзи Афғонистон раҳбари деб эълн қилингандан кейин ҳам бирор марта кўриниш бермаган.
Аввалроқ Ўзбекистон ва Россия темирйўлчилари трансафғон темирйўли бўйича ҳамкорликда иш бошлагани ҳамда АҚШнинг Афғонистондаги иштирокига оид кўплаб маълумотларни олиш чеклаб қўйилгани хабар қилинганди.
Жаҳонгир Қўзиев
